Har bir insonda taqdirini oʻzgartirib yuboruvchi va kelgusi hayot yoʻlini belgilab beruvchi uchrashuvlar boʻladi. Otabek Mahkamovning omadi shundaki, uning umr yoʻlida butunboshli kitobga jamlasa boʻladigan koʻplab ana shunday uchrashuvlar yuz bergan. Uning yuristlik va oʻqituvchilikdan tortib aktyorlik, jurnalistik, teleboshlovchilik, blogerlik hamda motivator notiqlikka qadar boʻlgan yorqin kasbiy faoliyatidan kelib chiqadigan boʻlsak, buning ajablanadigan joyi yoʻq.