Бедана бизнесига қизиққан, бошламоқчи бўлиб аммо бошламай юрганларга бизнес сотилади, Қандай боқиш, сақлаш, усулларини,
сотиш маслаҳатлари берилади. 100 дона бедана билан бошланг.
Ҳозирги кунга келиб бедана боқиш ва кўпайтириш иқтисодий жиҳатдан яхшигина даромадли соҳага айланган. Бедана анча маҳсулдор бўлиб, модаси бир йилда 250-255 тагача тухум қўйиши мумкин.

Тухумдан чиққан полапонларнинг қарийб 70-80 фоизи яшаб кетади. Жуда тез ривожланади ва турли касалликларга бардошли. Тўғри, беданананинг вазни енгил, тухумлари ҳам майда. Аммо бедана гўшти ва тухумларининг ғаройиб шифобахш хусусиятлари сабабли унга доим талаб юқори.

Беданани хонаки тарзда боқиш ва парваришлашнинг ўзига хос томонлари бор. Аввало, уларни яхши ўрганиш зарур. Бу қушлар шовқинни ёқтирмайди. Чунки улар озодликда ўтлар қалин ва баланд ўсган жойларни макон тутишади. Шу боис ҳам бедана парваришланадиган қафасларни 3 томонидан шовқин ўтказмайдиган мато билан қоплаш мақсадга мувофиқ.

Бедана сақланадиган қафас елвизак эсадиган ва кучли ёруғлик тушадиган бўлмаслиги лозим. Қафас ичига уюм-уюм ҳашак солиш талаб этилади, беданалар уларнинг орасига кириб олишни яхши кўради. Вақти-вақти билан уларни янгисига алмаштириб туриш керак.

Беданаларни озиқлантириш меъёрлари
Катта беданалар бир кеча-кундузда 2-3 марта озиқлантирилади. Омихта еми таркибида дон-ун (арпа, сули, майдаланган маккажўхори унлари аралашмаси) – 60 фоиз, оқсилли аралашма (творог, майдаланган балиқ) – 35 фоиз ҳамда минерал аралашма (тухум пўчоғи, бўр) – 5 фоиз бўлиши мақсадга мувофиқ. Одатда беданаларга соя ва кунгабоқар шроти (кунжара) бериш мумкин, аммо чигит кунжарасини бермаслик зарур.

Тухумдан чиққан полапонлар дастлабки ҳафта мобайнида бир кеча-кундуз 5 мартагача озиқлантирилади. Бир ярим ойлик бўлгунига қадар секин-аста камайтирилиб, 2 марта озиқлантиришга ўтилади. Ёз ойларида эса қушларнинг ҳар бирига қўшимча равишда кунига ўртача ўн грамм атрофида майдаланган барра ўт ҳам бериш тавсия этилади. Идишида ҳамиша тоза сув бўлиши лозим.

Икки ойлик бўлганидан сўнг беданаларининг вазни ўсишдан тўхтайди. Бу пайтда нар беданаларнинг оғирлиги 100-150 граммгача оқ беданалар 150-200 граммгача етиши мумкин.

Кўп тузум олишни кўзлаганлар учун бир квадрат мертлик майдонда 50 тагача бедана боқиш тавсия этилади. Бедана тухумларни совуққа таъсирчан, шу боис ҳам уларни тезроқ иссиқроқ жойга ўтказиш мақсадга мувофиқ.

Одатда битта бедана саккиз ой боқилади. Шундан олти ой давомида тухум олинади, саккиз ойдан сўнг гўштга сўйилади. Битта бедана олти ой давомида тахминан 130 тача тухум беради. Буни беданалар сонига кўпайтириб, даромадни чамалаш мумкин.